I alt er 22 personar evakuerte frå heimane sine i Skjåk. Dette gjeld personar busette i Nordberg i Skjåk, der det tidlegare i dag gjekk eit jordskred, og nokre som bur innved elva/bekken Ånda lenger aust i kommunen.
Var heime da skredet kom rett mot huset: – Det ser ikkje ut her!
Ras i Nordberg
– Alt tilgjengeleg mannskap, både kommunens eigne folk, entreprenørar og mannskap frå Skjåk Røde Kors hjelpekorps er anten ute eller i beredskap, fortel ordførar Edel Kveen tysdag kveld.
Når det gjeld dei evakuerte, var det eit tema som vart teke opp med Statsforvaltaren.
– Det er heilt uaktuelt at desse får flytte heim så lenge vi er midt inne i ein situasjon, som slett ikkje er over på ei stund ennå, var den klare beskjeden vi fekk, fortel Kveen.
Ho fortel at det raude farevarselet for skred vil bli oppretthalde også ei god stund etter at regnet ein gong vil gje seg.
– Det har så langt vore absolutt verst på sørsida av dalen, men nå ser det ut til at det kan bli utfordrande også på nordsida, seier ordføraren.
Servicetorget i kommunen er ope for å kunne bistå innbyggjarane.
Dei evakuerte er ivaretekne av kommunens psykososiale team og er anten innkvartert privat eller på Skjåk Turistheim.