Kommunestyregruppa til AP undrar seg i eit lesarinnlegg over at Vågå kommune har kjøpt eit kunstverk til utsmykking av den nye Vågåheimen utan at korkje varaordførar, formannskap eller kommunestyre var involvert. Innsendarane prøver i sitt lesarinnlegg å få det til å framstå som om eg har gått utover mine fullmakter. Dette er feil.
Det er riktig at ordførar under opningsdagen av Sommarutstillinga til Galleri Ullinsvin reserverte kunstverk med tanke på Vågåheimen, utan at dette var bindande for kommunen. Kommunedirektør vart informert om at kommunen no hadde moglegheit til å erverve kunstverket om ein såg seg tent med det. Det er Kommunedirektøren som har mynde til kjøp, da innanfor ramane til vedteke budsjett for Vågåheimen.
Det kan vera argument for og mot slike innkjøp, og det er ikkje uvanleg at det vert diskusjonar kring offentlege innkjøp av kunst. Det er likevel viktig for meg å understreke at framgangsmåten har vore riktig. Kommunedirektøren undersøkte saman med sine medarbeidarar om kunstverket kunne fylla det behovet ein såg for seg med tanke på utsmykking av fellesareal. Administrasjonen konkluderte med at kunstverket passa godt og at Vågå kommune såg seg tent med eit kjøp.
Kommunestyregruppa til Ap ynskjer ei orientering på neste kommunestyremøte. Der vil sjølvsagt ordførar og kommunedirektør belyse problemstillingane grundig.
