– Dette er eit historisk val for Senterpartiet, seier Mette Vårdal. Lokalpartiet har ikkje sett 30-talet sidan SP fekk 31 prosent av stemmene i 1947 og 30 prosent av stemmene i 1951.
Da 95 prosent av stemmene var talt opp måndag kveld låg det an til at partiet får 37,2 prosent av stemmene og 6 representantar i kommunestyret.
Tidlegare ordførar Kari Hølmo Holen inviterte til valvake heime i Holungsøyom.
– Kjempebra. Dette er heilt utruleg, seier Hølmo Holen som var Vågå sin fyrste kvinnelege og Senterpartiet sin hittil fyrste ordførar i bygda. Ho var ordførar frå 1992-1995.
– Det er sunt med eit skifte. Det er ikkje bra at eitt parti sit med makta år etter år. Eit skifte gjer det meir interessant å drive med politikk, seier Kari Hølmo Holen.
– Dette valresultatet er over all forventning. Veljarane har vore tydelege på at dei ynskte eit skifte. Med det mandatet skal vi nå gå i forhandlingar, seier Mette Vårdal.
Om stemninga i SP si valvake var sprudlande, kan ein ikkje seie det same om arbeidarpartiet si valvake på Vågå Hotel.
– Vi tek valresultatet til etterretning, seier Iselin Jonassen, arbeidarpartiet sin ordførarkandidat.
Jonassen seier at partiet nå vil gå i forhandlingar, men vil ikkje ut med kven.
– Vi held alle dører opne, seier Jonassen.
Målet til Vågå arbeidarparti var 50 prosent av stemmene. Resultatet ligg an til å bli 38,9.
– Eg føler vi jobba godt i valkampen. Nå skal vi analysere det vi har gjort. Å sitje med makta over så lang tid vil gje ei slitasje, seier Jonassen.
– Er du skuffa over resultatet?
– Når målet var 50 prosent kunne eg tenkt meg eit anna resultat, seier Iselin Jonassen.
