Dette er femte gong Lena Jenny og Geir Ove Melby står som arrangør av «Countryfestivalen i Skjåk» som går av stabelen frå torsdag 30. juni til sundag 3. juli.
I november gjorde arrangørane det kjent at festcountrybandet «Vassendgutane» skal opne årets countryfestival frå hovudscenen. Nå slepp Lena Jenny og Geir Ove namna på resten av artistane som skal opptre på årets festival på Skjåkøygarden.
Frå USA kjem countryartistane Buddy Jewell og Sarah Gayle Meech. Root'n Toot'n og Doggone Honkabillies frå England skal også opptre. Frå Sverige kjem Don Redmon, eller Andreas Johansson, som er hans eigentlege namn. Mange norske artistar står også på årets artistliste: Gunslingers, Vassendgutane, Sivert Bjørdal, Bjørn Wikøren, Hilljacks, Steff Nevers, Ni Liv, Jon Kolden og Corner Boys kjem alle til Skjåk i sommar.
– Vi tykkjer at vi nok ein gong har fått tak i 14 fantastiske artistar. Som tidlegare år har vi også denne gongen variert countrymusikk som når alle aldersgrupper, seier arrangørane.
Allereie torsdag kveld brakar det laus på hovudscenen med «Vassendgutane» som har 20-årsjubileum i år, medan det inne på låven denne kvelden vil variere mellom irsk og tradisjonell country- og hillbillymusikk. Gjennom heile helga vil det som vanleg bli musikk frå tre scener på festivalarenaen.
Festivalarrangørane gler seg til årets festival på Skjåkøygarden, og ynskjer gamle og nye gjestar velkomne.
– Dersom ein vil sikre seg ein plass på festivalcampen, kan det vera lurt å bestille dette så fort som mogleg, då det allereie byrjar å fylle seg opp, sier Lena Jenny Melby.
