Det er laurdagskveld og dei siste strålane av dagsljos er i ferd med å sløkkje over Ottadalen. Det er tid for å lauge seg til helga.

Dei aller fleste likar best varmt sommarver og badetemperaturar over 20 grader. Men det er lenge til sommaren. Og skal ein tru medlemmene i Ottadalen isbadeklubb er det ikkje noko som heiter dårleg badevêr. Det er berre å hoppe i det.

På Skim nedanfor Nørstneshågån har Stein Magne Skjedsvoll og Jon Kroken denne dagen laga hol i isen. Dei hadde brukt mange timar på å få hol på den halvmeter tjukke isen.

– Vi brukte motorsag, men sverdet på saga vart for stutt. Og saga vart blaut, seier Jon Kroken. Men hol vart det. Stort nok for ein person.

Nå står dei to karane på iskanten saman med Aud Flatmo, Jorunn Kroken og Gry Ramstad. Kven av dei fem er den som vågar seg ned i vatnet fyrst? I lufta er det eitt par varmegrader. Stort varmare er det ikkje i vatnet.

Den 20. desember i fjor da gjengen gjorde sitt fyrste isbad på Skim, var det tolv varmegrader i lufta.

Jon er den fyrste som kliv ned stigen og sklir ned i vatnet. Ein rask dukkert og raskt opp att. Så går det etter tur. Ingen vil vere pysete, men kliv ned stigen og ned i vatnet.

Oppe på isen att er alle raske til å springe mot land der det er fyra opp eit bål for å varme seg.

Men desse hardhausane gjev seg ikkje med ein dukkert. Det blir fleire.

– Forfriskande. Ein blir god og varm i kroppen etterpå, seier Stein Magne.

– Helsemessig er det sunt med isbading, seier badegjengen. Dei håpar fleire vil vere med på dette. Fleire hadde vel sagt at dei skulle vere med, men fekk bokstaveleg tala kalde føter…

Badegjengen har prata om å ta eitt utandørs bad ein gong i månaden, men så langt har det berre vorte ved høgtidene jul og påske.

– Vi lurar på om vi skal spare noko is slik at vi får eit isbad til sommaren og, seier Stein Magne.

Jon Kroken gjev teikn på at han trivst som isbadar. Foto: ARVE DANIELSEN