Influensasesongen i gang – risikogrupper og helsepersonell blir bede om å vaksinere seg

– Det hastar nå for personar i risikogruppene og andre målgrupper å vaksinere seg, heiter det i ei melding frå Statsforvaltaren i Innlandet.

Auken i influensatilfelle ser ut til å inntreffe noko tidlegare enn normalt. Det har vore mindre influensa i Noreg i løpet av koronapandemien, og truleg er immuniteten i befolkninga lågare enn normalt.

– Vi påpeikar at helsegevinsten kan vera stor om personar i risikogruppene og andre målgrupper vaksinerer seg nå. FHI oppfordrar spesielt kommunar å sikre god informasjon til risikobarns foreldre, ha tilbod om både nesesprayvaksine og vanleg vaksine og sørge for eit lett tilgjengeleg vaksinasjonstilbod, heiter det vidare i meldinga frå Statsforvaltaren.

Influensavaksinane for komande sesong er nå sendt ut til kommunane, og haustens influensavaksinering pågår i kommunar i Innlandet.

Vaksinasjonsdekninga i befolkninga i Innlandet per i dag er lågare enn landet elles, men ein ventar at talet vil auke fram mot jul. Det same gjelder blant tilsette i helsetenesta i Innlandet.

FHI tilrår helsepersonell å ta årleg vaksine mot influensa for å beskytte pasientar, kollegaer og seg sjølv.

– Vi forventar at vaksinasjonsdekninga blant tilsette i helsetenesta i Innlandet blir høgare, er den klare meldinga frå Statsforvaltaren i Innlandet.