Det opplyser Meteorologisk institutt (MET) i ei pressemelding.
MET tilbyr nå «21-dagersvarselet» på nettstaden Yr.no.
Yr har sidan starten i 2007 hatt vêrvarsel for 10 dagar fram, men nå utvidar MET varslingsperioden til heile 21 dagar.
Et vêvarsel så langt fram i tid er typisk meir usikkert enn eit vêrvarsel for dei neste dagane. Difor har Yr delt varselet inn i tre rullerande sju-dagars bolkar.
«21-dagersvarselet» viser, som namnet tilseier, vêrutviklinga 21 dagar framover i tid. Vêrvarsla viser temperaturutvikling og sjanse for nedbør dag for dag, og også ein oppsummeringsboks med oversikt veke for veke, tre veker fram.
I fylgje MET vil desse langtidsvarsla fyrst og fremst fortelja noko om sannsyn og trendar, og vil til dømes ikkje seie noko om akkurat når på dagen det byrjar å regne om 2-3 veker.
Varselet finn ein under fana «21-dagersvarsel» på nettstaden Yr.no.
Det nye langtidsvarselet er opphavleg basert på tre ulike vêrvarslingsmodellar, som alle oppdaterer seg med ulikt tidsintervall og har ulik geografisk oppløysing.
Ein betydeleg innsats har vore gjort for å gjera det nye varselet til eit sømlaust vêrvarsel, som til ein kvar tid også samsvarer med det opphavlege 10-dagarsvarselet.
I likskap med det vanlege varselet på Yr, er også «21-dagersvarselet» kalibrert mellom anna ved hjelp av data innhenta frå private vêrstasjonar.
Det nye varselet har lenge vore ynskt frå ulike brukargrupper. Det fortel Bård Fjukstad, som er varslingsdirektør ved MET.
– Med «21-dagersvarselet» utvidar vi tilbodet på ein god og nyttig måte, seier Fjukstad.
Tilbodet vil i fyrste omgang vera tilgjengelig berre på nett, men vil seinare også dukke opp i Yr-appen.