«Sytalause Spelemenn» er namnet på programmet som blir sendt på TV 2 fredag kveld. Dette er ein dokumentarfilm om det populære festcountrybandet «Vassendgutane» der Alf Rune Melby frå Skjåk er blant medlemane.
Filmen er ein del av mastergraden Roger Oldeide frå Ålesund tok i Dokumentar og journalistikk ved Høgskulen i Volda.
Studenten fylgde «Vassendgutane» med kamera i over eitt år. Filminga vart starta da bandet varma opp for den amerikanske countrystjerna Brad Paisley i Oslo Spektrum i april 2014. Siste opptak vart gjort i Ørsta 15. mai 2015, under platesleppfesten til plata «Skru opp!!».
I dokumentaren «Sytalause Spelemenn» prøver Roger Oldeide å finne svar på korleis det har seg at «Vassendgutane» kan vere både det mestseljande og eitt av dei mest kritikarslakta banda i landet.
Platearbeid, øvingar, studioinnspeling, livet i turnébussen, konsertar, og intervju med både bandmedlemane og kritikarar, er blant det ein får sjå i filmen, som i fylgje dokumentarfilmskaparen ikkje er meint som nokon hyllest til festcountrybandet, men som eit journalistisk prosjekt.
Den 53 minuttar lange dokumentarfilmen «Sytalause spelemenn» blir sendt på TV 2 fredag klokka 21.45.
