To barnehagar i Skjåk

Kultur- og oppvekstutvalet skal ta stilling til barnehagestruktursaka i Skjåk fyrstkomande tysdag.

Rådmannen legg nå fram to alternative løysingsforslag. Det eine er å setja i gang eit planprosjekt for å byggje ny barnehage i Bismo, eller byggje ut eksisterande barnehage, slik at Skjåk får totalt 108 barnehageplassar og 6 avdelingar.

Det andre alternativet er at det skal utgreiast eit alternativ med barnehage i Dønfoss med 36 plassar, og utbygging til 72 plassar, det vil seia 4 avdelingar, i Bismo.

Rådmannen held fast på at barnehagen i Holemork blir lagt ned.

– Den 23. august var det felles drøftingsmøte mellom formannskap og kultur- og oppvekstutvalet om barnehagestrukturen. Signala om å oppretthalde Dønfoss naturbarnehage var tydelege. På den bakgrunnen vil rådmannen tilrå at alternativet med 36 plassar i Dønfoss og 72 plassar i Bismo blir utgreidd som alternativ, skriv rådmannen i si vurdering av saka.