– Vaksinasjon er framleis heilt sentralt for å handtere koronapandemien, seier helse- og omsorgsminister Ingvild Kjerkol i ei pressemelding fredag.
Regjeringa har nå bestemt at personar mellom 18 og 64 år utan underliggjande sjukdomar skal få tilbod om ei ny oppfriskningsdose med koronavaksine.
Frå før har personar over 65 år, og personar yngre enn 65 år som er meir utsett for alvorleg sjukdomsforløp av korona, vorte oppmoda til å ta oppfriskningsdose.
– Vi tilbyr nå ei ny oppfriskningsdose til personar over 18 år som ikkje er omfatta av oppmodingane. Ved å gjeva tilbod om vaksine til fleire, er vi betre førebudd om smittesituasjonen skulle forverre seg framover. Koronavaksinene beskyttar godt og lenge mot alvorleg sjukdom, seier Kjerkol.
Regjeringa si avgjerd baserer seg på oppmodingar frå FHI. Vaksinetilbodet gjeld også helsepersonell.
– Kommunane og helseforetaka kan nå også gjeva tilbod om oppfriskningsdose til helsepersonell i fyrstelina, seier Kjerkol.
Det er kommunane som organiserer vaksinasjonstilbodet. I fylgje regjeringa kan vaksinasjon av gruppa frå 18 til 64 år utan underliggjande sjukdom starte i kommunar som har gjeve eit tilstrekkeleg tilbod til risikogruppene, alternativt gjeva eit parallelt tilbod om det er tilstrekkeleg kapasitet.