1. januar i år vart det innført fleire nye og strengare reglar for bruk av elsparkesykkel. Ei av endringane er at ein elsparkesykkel nå er klassifisert som motorvogn, noko som inneber nye krav, mellom anna er det nå lovpålagt med ansvarsforsikring på sykkelen.

Fordi elsparkesykkel reknast som motorvogn, så vil også reglane om handhalden mobiltelefon under køyring gjelde når du brukar elsparkesykkelen, på lik line med bilkøyring. Reglane inneber at det ikkje er lov å taste på sjølve telefonen eller halde den i handa under ei samtale når du køyrer elsparkesykkel.

Du kan bruke mobiltelefonen lovleg ved å starte og avslutte samtaler med handsfreesystem.

Fiklar du med mobilen på elsparkesykkelen i trafikken og politiet stoppar deg, blir du straffa med ei like høg bot som ein bilførar ville fått, nemleg 9.700 kroner.

– Sidan det ikkje er krav om førarkort for å køyre elsparkesykkel får du ikkje prikkar som straff i tillegg til bota, slik du ville fått bak rattet i ein bil, seier fagsjef på motor i Frende Forsikring, Roger Ytre-Hauge, i ei pressemelding, og held fram:

– Dersom du for eksempel står i ro på raudt ljos og sjekkar mobilen kan du få bot. Grunnen er at du er ein del av trafikken og da gjeld reglane som bilistane må forhalde seg til.

Situasjonen er annleis dersom du køyrer på fortau.

– Dersom du står i ro med elsparkesykkelen din på eit fortau eller noko slikt er du ikkje ein del av trafikken. Da unngår du bot, seier fagsjefen.

Elsykkel og vanleg sykkel er ikkje klassifisert som motorvogn, og er difor friteke frå nemnde reglar.