Eit lågtrykk passerer Sør-Noreg onsdag, og Meteorologisk institutt (MET) har tysdag ettermiddag sendt ut farevarsel på gult nivå for kraftige vindkast.
Farevarselet gjeld for Austlandet og Sørlandet onsdag ettermiddag og kveld.
I fylgje MET er det venta sørvest sterk kuling på kysten og i fjellet. Det kan også bli liten storm.
Det er venta lokalt kraftige vindkast omkring 20 m/s i indre strøk. På fjellet kan det bli enda kraftigare vindkast.
MET opplyser at det er venta at vinden aukar klokka 14 onsdag ettermiddag, og at vinden løyar klokka 22 onsdag kveld.
Meteorologane i MET rår folk til å sikre eventuelle lause gjenstandar før den kraftige vinden tek til.
– Lause gjenstandar kan blåse avstad. Straumforsyninga kan bli påverka, for eksempel som følgje av tre som knekker eller kjem i kontakt med straumnettet. Enkelte vegar kan bli stengt på grunn av tre eller andre objekt i vegbana. Unngå unødvendig ferdsel på utsette stader, oppmodar MET.