Sur vind la ingen dempar på stemninga på Lemonsjøen laurdag, da Høkkers Invitational vart arrangert. Fleire hundre publikummarar kom og fekk sjå rå skikøyring i Skavlein og tøffe hopp i parken.

Seks damer og 22 menn stilte i frikøyringskonkurransen. Av desse var sju lokale køyrarar: Jo Vaagaasarøygard, Henrik Gangsø, Eirik Schjølberg, Øystein Vaagaasarøygard, Øystein Aasheim, Torgrim Vole og Omund Valde Sletten.

Da kvalifiseringa var over stod Henrik Gangsø øvst på resultatlista med 92 poeng. Dermed hadde arrangøren Trollhøe Høkkers ein av sine i finalen.

I finalen stod Gangsø att einsleg på toppen etter at dei andre hadde køyrt. Han skulle avgjere Høkkers Invitational.

– Da eg stod på toppen hadde eg to val. Anten å sikre ein andreplass eller å gje alt. Eg bestemte meg for å gje alt, sa Henrik Gangsø.

På fyrste skavlen gjorde Gangsø som i kvalifiseringa og gjorde ein backflip. Da han kom ut på andre skavlen gav han alt i ein ny backflip. Det var vinn eller forsvinn. Gangsø fall og forsvann frå pallplassering.

Til topps gjekk hallingdølen Robert Ruud som vann premiepotten på 100.000 kroner. Hedvig Wessel vann dameklassen. Dermed gjekk sigeren til ein slopestyleutøvar og ein kulekøyrar.

Dei to vinnarane var svært godt nøgde med arrangementet.

Om det ikkje vart siger eller pallplass på nokon av dei lokale, var konkurransen og arrangementet ein siger for Trollhøe Høkkers.

Daniel Gangsø smilte frå øyra til øyra etter at det heile var over på Lemonsjøen. Sjølv om det såg svart ut fyrst i veka, der snøen rann bort framfor arrangørane, hadde dei vergudane på si side etter at løypa vart flytta.

– Dette er det kulaste skirennet i Noreg med rå skikøyring. Aldri har nivået vore større, sa Gangsø.

– Blir det nytt Høkkers Invitational til neste år?

– Vi vil det dersom sponsorane er med vidare, avsluttar Daniel Gangsø.

Daniel Gangsø frå arrangøren Trollhøe Høkkers, saman med vinnarane Robert Ruud og Hedvig Wessel. Foto: ARVE DANIELSEN