I 2022 vart det produsert og sendt ut rekordmange pass og ID-kort i Noreg, også i Innlandet. Årsaka var etterslep etter pandemien og gjenopning av samfunnet med auka reiseaktivitet.

Også i 2023 er det mange med behov for å bestille og fornye pass og ID-kort. Per januar er det 317.000 pass som går ut i løpet av året. For Innlandet er talet 23.000.

Dette opplyser politiet i ei pressemelding.

Politiet oppmodar innbyggjarar til å vera tidleg ute med å bestille time.

– Vi oppmodar spesielt foreldre til å sjekke barnas pass, da dei kan ha ulik utløpsdato og fordi passa til barn og unge har kortare gyldigheit enn vaksne, seier Hilde Kristiansen Hauge, seksjonssjef ved pass/ID i Innlandet politidistrikt.

Medan det i 2022 var utfordringar med levering av pass og ID-kort, er politiet nå i normalsituasjon når det gjeld leveringstider. Politiet presiserer at dette kan endre seg når pågangen for å bestille nytt pass eller ID-kort aukar.

– Vi forventar auka etterspurnad særleg etter påske, og det blir arbeidd med å unngå same situasjon som våren og sommaren 2022, seier Hauge.

Per måndag 30. januar er fyrste ledige time for å bestille pass/ID-kort 30. januar på Otta og Fagernes, og 3. mars på Lillehammer. På Gjøvik er fyrste ledige time så seint som 17. april.

Politiet oppmodar innbyggjarar som planlegg å reise utanlands om å sjekke når pass eller nasjonalt ID-kort går ut, og bestille time så raskt som mogleg.

Dersom ein ikkje finn ledig tidspunkt ved sitt næraste politikontor som ordnar med pass, kan ein prøve eit anna kontor.