Det opplyser Innlandet fylkeskommune.
I samband med arbeid på fundamentet lengst mot aust, sjølve landkaret, skal entreprenøren sage og spyle betong under høgt trykk. På grunn av tryggleiken til trafikantane må E6 stengast medan dette skjer.
Fylkeskommunen opplyser at arbeidet for det meste kjem til å skje mellom klokka 07.00 og 19.00 måndag til fredag i perioden 14.-30. mars. Resten av tida vil E6 vera open for trafikk. I dei periodane E6 er open, er fartsgrensa sett ned til 40 km/t ved anleggsplassen.
Når E6 er stengt, vil det bli skilta omkøyring om Tretten sentrum for all trafikk bortsett frå modulvogntog, som må køyre riksveg 3 gjennom Østerdalen.
Trafikk frå nord tek av ved Bådstø på kommunalvegen Kongsvegen og vidare sørover på fylkesvegane 2554 og 254 til rundkøyringa nord for Øyertunnelen. Trafikk frå sør tek av frå E6 ved utløpet av Øyertunnelen.
– Gjennomgangstrafikk mellom Oslo og Trondheim bør velgje riksveg 3 framfor E6 når E6 er stengt, for å avgrense trafikken på omkøyringsvegen, oppmodar Innlandet fylkeskommune.
Prosjektleiar Rolf Klemetrud i fylkeskommunen håpar at den mellombelse brua på Tretten blir klar for trafikk i løpet av mai. Brua vil få eitt køyrefelt og trafikken blir ljosregulert.