Fylkesutvalet i Oppland vedtok i 2014 at 1. april blir fast opningsdato for den nasjonale turistvegen mellom Nord-Gudbrandsdalen og Valdres.

Pressekontakt i Statens vegvesen region øst, Åsmund Møller Johansen, fortel at dersom det ikkje blir styggevêr på fjellovergangen, vil fylkesveg 51 over Valdresflye bli opna fredag denne veka som planlagt.

– Entreprenørane er godt i rute med snøfresinga. Det var litt rufsete vêr på Valdresflye i påska, noko som gjorde at vegen føyka att enkelte stader, men dette skal det vere full kontroll på, og vegen er klar for opning, seier Johansen.

Ved vegtrafikksentralen får Fjuken onsdag føremiddag opplyst at det ikkje er teke stilling til klokkeslettet vegen skal opnast fredag, men at dette vil bli oppdatert på trafikkmeldingane på nettsidene til Statens vegvesen så fort det er klart.

Som tidlegare år vil vegen over Valdresflye halde nattestengt mellom klokka 20.00 og 08.00 ei tid framover før den blir døgnopen.