Det er dei tre lomværane Ola Rossehaug, Bjarte Rossehaug og Stein Magne Eggen som står bak det nye underhaldningskonseptet «Heia Lom!».
Konseptet går ut på at seks sporty lomværar skal konkurrere i 12 ulike oppgåver. Desse oppgåvene skal deltakarane løyse på sin måte. Oppgåvene er, i fylgje idéskaparane, ei blanding av selskapsleikar, logiske oppgåver og «fjas», og består av både individuelle oppgåver og lagoppgåver.
Ein del av oppgåvene med deltakarane er filma på førehand, og vil bli synt fram på storskjerm, medan andre oppgåver vil bli utført av deltakarane direkte i Utgard.
Dei seks lomværane som skal konkurrere mot kvarandre i «Heia Lom!» er Øyvind Moe, Merete Byrøygard, Gro Nørstebø Moshagen, Pål Haugen, Gro Moen Nørjordet og Ola Vaagaasarøygard.
Sjå ein liten smakebit av kva som ventar her:
Det vil bli delt ut poeng og kåra ein vinnar. Hovuddommar er Hans Erik Kjosbakken. Han har med seg Jim Jonsson som assistentdommar.
«Heia Lom!»-showet i Utgard er for lengst utseld. Bortimot 300 publikumarar er venta fredag kveld.
Dei tre idéskaparane Ola Rossehaug, Bjarte Rossehaug og Stein Magne Eggen lovar god underhaldning, mykje humor og høgt konkurranseinstinkt i Utgard.
Er du Fjuken-abonnent, har lyst til å sjå showet, men ikkje fekk kjøpt deg billett? Da får du likevel høve til å sjå «Heia Lom!» fredag kveld - digitalt. Fjuken-TV skal nemleg sende heile showet direkte på fjuken.no.
Showet startar i Utgard klokka 19:30, og Fjuken går etter planen på lufta cirka eit kvarter før showstart. Her tek vi sikte på å få nokre intervju og «lade opp» til «Heia Lom!»-showet.
Showet vil også liggje tilgjengeleg som opptak i etterkant av direktestrøyminga.