Fjuken-redaktør Hans Erik Kjosbakken er sentral i sjølve konkurransen: Han er hovuddommar, og har med seg Jim Jonsson som assistent.
Det er dei tre lomværane Ola Rossehaug, Bjarte Rossehaug og Stein Magne Eggen som står bak underhaldningskonseptet «Heia Lom!».
I oktober i fjor fekk ei fullsett kulturstugu i Utgard oppleve det som var fyrste utgåve av direkteshowet, der seks lomværar konkurrerte mot kvarandre.
Han vart tidenes fyrste «Heia Lom!»-vinnar
Nå er seks nye deltakarar klare for konkurranse.
Årets «Heia Lom!»-deltakarar er Tora Slettom, Emil Ramen, Vigdis Kroken, Arnt Rune Vole, Gunn Berit Vole Mork og Lars Bakke.
Kort fortalt er «Heia Lom!» ei uhøgtideleg konkurranse mellom seks deltakarar. Deltakarane får oppgåver av ymse slag, nokre vanlege oppgåver, nokre er litt meir utradisjonelle.
Dei aller fleste oppgåvene har vore filma på førehand og oppgåveløysingane til deltakarane vil bli synt fram på storskjerm i Utgard.
Deltakarane har ikkje sjølve sett opptaka på førehand, og får sjå måten dei løyser dei ulike oppgåvene på samtidig som publikum. Det blir også gjennomført oppgåver direkte i Utgard.
Billettane til andre sesong av «Heia Lom!» vart utseld etter berre nokre dagar, så einaste moglegheit til å få med seg dette showet på om ein ikkje fekk sikra seg billett, er faktisk via Fjuken.
Her kan nemleg alle abonnentar få med seg heile showet.
Sjølve showet i Utgard startar klokka 19.30 fredag kveld, og vil bli sendt direkte på Fjuken-TV. Men allereie ein halvtime tidlegare går Fjuken på lufta i Utgard. Da vil vi «ta tempen» på både publikum og deltakarar og høyre kva forventningar dei har for kvelden.
Vi vil også ta med sjåarane bak scena og gjeva dei eit innblikk i korleis produksjonen går føre seg.
«Heia Lom!»-showet blir liggjande som eit opptak på Fjuken-TV etter direktesendinga fredag.