Ein skuletur til landets høgaste fjell er krevjande nok i seg sjølv. 7. klasse ved Loar skule i Lom har ein årviss tradisjon for å ta ein tur til Galdhøpiggen om våren. I fjor vår var turen ekstra gjæv, grunna pågangsmotet til løysingsorienterte tilsette ved Loar skule.

Eleven Andreas Eriksen Strand har funksjonshemming som gjer at han sjeldan har kunne vore med på utedagar og fjellturar ved Loar skule.

Med Andreas sine føresetnader var det difor inga sjølvfylgje at han kom seg på toppen av Galdhøpiggen med klassa si i fjor vår.

Assistent Erling Bjørn Fossen (Elle) bestemde seg for at avslutningsturen i 7. klasse, skulle Andreas få vere med på. Med seg til toppen av Galdhøpiggen hadde Andreas Eriksen Strand dei gode hjelparane Elle, Sjur Bjørgen, Eilev Hellekveen og Ola Rossehaug.

Både ver og lende var til dels utfordrande, men med god innsats og Andreas sitt gode humør, gjekk det bra. Både Andreas og klassa elles var tydeleg stolte og glade over å ha greidd denne turen saman.

NRK var med og filma det heile, både førebuingane og sjølve gjennomføringa av turen.

I kveld, langfredag, syner NRK den 14 minuttar lange dokumentaren som er ein del av serien «Glimt av Norge». Dokumentaren frå Lom har fått tittelen «Andreas og de gode hjelperne» og viser Andreas og fylgjet hans, men også heile 7. klasse på turen til Galdhøpiggen.

Programmet ser du på NRK1 klokka 22.40 langfredag. «Glimt av Norge: Andreas og de gode hjelperne» blir også tilgjengeleg på NRK nett-tv frå fredag kveld.

Andreas, hjelparane og resten av 7. klasse på toppen av Galdhøpiggen. Foto: Ola Rossehaug