– Skikkeleg artig, sa Ann Marlen Randen og Line Stee da dei mellomlanda på Otta på tur heim att til Lom og Skjåk frå fylkesmeisterskapet på Dokka torsdag.

Fylkesmeisterskapet i helsearbeiderfaget er ein konkurranse der lærlingar og VG2-elever konkurrerer i arbeidsoppgåver ein helsefagarbeidar gjer til dagleg. Kvart lag består av to personar.

Ann Marlen Randen og Line Stee representerte Nord-Gudbrandsdal vidaregåande skule - avdeling Otta i konkurransen. Dei konkurrerte mot fire andre lag frå Dokka, Raufoss, Lillehammer og lærlingar frå Gjøvik.

Ann Marlen og Line er to av 14 elevar som går VG2 helsearbeidarfag på Otta. Dei fortel at det var intern konkurranse i klassa om kven som skulle få delta i fylkesmeisterskapet på Dokka.

Dei fortel at konkurransen vart gjennomført som eit rollespel, der skodespelarar spela pasientar og to dommarar som dømmer utifrå gjevne kriteria. Både skodespelarane og deltakarane har mikrofon, slik at dommarane og publikum høyrer kva som blir sagt.

Ann Marlen og Line fortel at dei fekk 15 minutt på å planlegge oppgåva dei fekk tildelt, 20 minutt på gjennomføring, og 15 minutt evaluering saman med dommarane.

Oppgåva Ann Marlen og Line fekk var ein pasient som har hatt lungebetennelse. Dei skulle få vedkommande opp av senga, gje rettleiing i kost og aktivitet.

Anne Marie Høie, lærar på helse og oppvekstfag, tykte det var artig å høyre og sjå jentene i aksjon under oppgåva. Ho rosar Ann Marlen og Line for å halde på dialekta si.

– Eg trur ikkje han skjønte alt oss sa, sa Line og nemner ord som «mårgåverd». Ho og Ann Marlen er dei fyrste elevane frå helsearbeidarfag på Otta som har vorte fylkesmeistrar.

– Artig, sa Ann Marlen Randen.

– Vi er lite grann stolte, sa Line. Ho og Ann Marlen trudde ikkje dei skulle vinne framfor lærlingane frå Gjøvik.

Vinnaren av fylkesmeisterskapet representerer sitt fylke under NM i helsearbeidarfaget. Men det er berre ei av dei som får reise til NM i Bergen til hausten. Kven av dei det blir, er ikkje bestemt. Den som vinn NM, får reise til VM i Dubai. Der har ei frå Norge vunne tidlegare

Nord-Gudbrandsdal vidaregåande skule - avdeling Otta, stakk også av med sigeren i konkurransen i ungdomsarbeidarfaget. Her deltok Simon Rydland frå Vinstra og Marthe Lusæter Berg frå Dovre.