Den Norske Turistforening (DNT) sitt tilbod til barnefamiliar veks og er større og betre enn nokon gong. I dag, sundag, blir Kom deg ut-dagen som er landets nasjonale turdag arrangert over heile landet, frå Kristiansand i sør til Nordkapp i nord.

Denne dagen inviterer DNT til turar og aktivitetar i nærmiljøet for familiar og andre som har lyst til å vere med på ein triveleg dag ute.

Kom deg ut-dagen gjev moglegheit for å møte andre barnefamiliar, leike, lære og teste ut nye aktivitetar, som kanopadling, fjellklatring, slakk line, naturstig, orienteringsløp og anna.

– Vi vil inspirere alle til å kome seg ut for å oppleve ein fin og sosial dag i naturen, og håpar opplevinga kan gjeva inspirasjon til ein aktiv haust og vidareføring og utvikling av gode turtradisjonar, seier generealsekretær i DNT, Nils Øveraas, i ei pressemelding.

Dei siste åra har DNT sine tilbod til barnefamiliar, Barnas Turlag, vorte over 200 i talet på landsbasis. Interessa er stor med heile 59 nye turlag sidan 2013.

Det er venta mykje liv og røre rundt om i landet sundag, og DNT ventar at om lag 40.000 personar vil delta på Kom deg ut-dagen.

Her kan du søkje opp og sjå kva som skjer rundt om i landet på Kom deg ut-dagen.