Skjåk kommune har i fleire månader venta på svar om dei vil få mindreårige flyktningar til bufellesskapet som er oppretta i den gamle prestebustaden i bygda.
Integrerings- og mangfalddirektoratet (IMDi) har ikkje kome med klare svar, og kommunen har hatt store løpande utgifter som fylgje av apparatet som er sett i gang.
Tysdag, etter at rådmannen hadde orientert formannskapet om den vanskelege stoda kommunen er sett i, kom det inn ein epost frå IMDi der kommunen blir beden om å ta imot fire unge afghanske gutar på 15-16 år.
– Dette må eg seia er ei gladmelding, sa rådmann Svein Holen - noko formannskapet naturleg nok sa seg einige i.