av Øystein Skarset, Tverrpolitisk liste Lom
Bustadsituasjonen i Lom er ei sak Tverrpolitisk liste er svært opptatt av. Det er i dag personar og familiar som ønskjer å busette seg i Lom, men som ikkje finn ein stad å bu. Dette er ikkje ein haldbar situasjon, og Tverrpolitisk liste ønskjer å ta tak i denne utfordringa med tanke på å betre situasjonen på kort og lang sikt.
For det første er det viktig å få på plass nye såkalla gjennomgangsbustadar, der først og fremst personar som skal arbeide i Lom kommune kan bu i ei avgrensa periode. Vidare er det behov for å få på plass utleigeleilegheiter for unge.
I dag er det i Lom bustadmangel, samtidig som det i kommunen kanskje er så mange som 50 hus som står tomme. Mange av desse husa blir i dag nytta som fritidsbustad. Dersom utviklinga held fram som den har gjort til no, vil det bli stadig fleire folketomme hus i tida som kjem.
Mange av husa i og rundt Lom sentrum vart bygde på 70- og 80-talet. I mange av desse husa bur det folk som er godt oppi åra, og husa vil naturleg nok komme til å skifte eigar om nokre år. Truleg vil mange av husa bli tatt over av nær familie og nytta som fritidsbustad. Det er derfor fare for at det om nokre år kan bli både mørkt og stille i bustadfelta i Lom vinterstid dersom for mange av husa blir nytta berre som fritidsbustad. I Lom ønskjer vi liv og røre heile året, og ikkje minst ønskjer vi fastbuande som betalar skatt til kommunen.
Med tanke på faren for den nemnde utviklinga, er det viktig at politikarane no avgjer om det skal innførast buplikt i Lom. Innføring av buplikt er ei sak med mange sider som det må takast omsyn til. Mellom anna er det å innføre buplikt svært inngripande i folk sin rett til sjølve å råde over eigedomen sin. Politikarane må vege dette opp mot behov som Lom som samfunn måtte ha.
Eg bur i eit forholdsvis nytt hus sentralt i Lom, eit hus som er bygd på dyrkamark og på tomt subsidiert av Lom kommune. Huset og tomta er etter mi meining heilt fantastisk som bustad, ikkje minst for ein barnefamilie. Dersom det ikkje blir innført buplikt i Lom, kan kanskje eit av mine tre barn ein dag ta over huset og nytte det som fritidsbustad. Men er det rett at eigedomen min ein dag skal nyttast berre i påska og eit par veker elles i året?