av vidaregåandeelev

(Redaktøren kjenner identiteten til skribenten)

Søknadsportalane for vidaregåande utdanning, høgskular og universitet er i ferd med å opne, og det gjer også munnane til alle vaksne med ein ungdom i livet sitt. Sjølv var eg veldig sikker på kva eg skulle søkje på vidaregåande, og hadde heldigvis nok ryggrad til å halde fast ved det valet, trass mange vaksne sine ulike meiningar om det. Meiningar som eg forresten aldri hadde spurt om å få høyre. Valet eg tok er eg svært nøgd med i dag, og eg tvilar på at eg hadde fått det så godt nokon annan stad som det eg fekk på den lina og skulen eg valde.

Dessverre er ikkje alle ungdommar så heldige.

Eg har nokre kompisar og venninner som valde feil fordi dei høyrde på alle andre enn seg sjølv. Dette resulterte for fleire i at dei droppa ut, eller måtte byrje på ei anna line eitt, to, eller tre skuleår etter. Elles er det nokre som berre har fortsett å gå der dei «vaksne» bestemte at dei skulle, men ikkje er særleg nøgde med der dei går.

Langtidskonsekvensane av dette er at DU får eit barn som endar i ein jobb dei ikkje likar, eller enda verre – i eit liv dei ikkje likar.

Ungdommar har nok press på seg frå alle hald frå før, og det kan godt hende at du og andre vaksne har gode intensjonar når de kjem med råd, men det har med respekt å gjere også. Dersom ungdommen din er heilt sikker på kva line hen skal gå, er det veldig respektlaust av deg å snakke ned den linja. Dessverre nøyer dei fleste seg ikkje berre med det, for dei foreslår gjerne ei anna linje som er heilt annleis. Dette trass i at ungdommen sine eigenskapar og interesser ikkje samsvarer med linja den vaksne foreslår.

Du som vaksen kan jo sjølv tenkje deg korleis du hadde reagert om ein annan vaksen byrja å fortelje deg at du har valt feil jobb, at du ikkje er blitt noko, og fylgt opp med å fortelje kva arbeid du burde søke i staden. Kva hadde du tykt da?

Framover kan de kanskje lytte til borna dykkar og ta omsyn til kva eigenskapar og ynskje dei har. Om ungdommen din skulle velje feil, er det i alle høve eit val dei har teke på eiga hand som dei kan lære av og rette opp i sjølve.