Kveldsros - litt av ei dame

Kveldsros frå Vågå har mjølka over 110 tonn og har ei helse heilt utanom det vanlege. Nå får ho snart diplom, heider og ære.

Veit kva ho vil Kveldsros er ei mjølkeku heilt utanom det vanlege.   Foto: RANDI T. AANSTAD

Heider GENO heidrar NRF-kyr som har mjølka over 100 tonn med diplom. I tillegg får eigaren fem doser valfri, ordinær NRF-sæd.  Foto: GENO

Nyheiter

Kveldsros er ei godt vaksen dame. Ho fylte 15 år i juli. Så langt i livet har ho vore frisk og sprek. Berre to gonger har ho hatt helsebehandling, ein gong for jurbetennelse og ein gong for mjølkefeber.

– Det er svært sjeldan at kyr blir så gamle. Ei NRF-ku mjølkar gjennomsnittleg 7,4 tonn i året, men Kveldsros ligg høgt over det nivået, fortel Randi T. Aanstad, fagrådgjevar i Tine. Ho fortel at GENO skal gjera ære på Kveldsros i løpet av hausten.

Det er Bjørn Åge Sveen som eig Kveldsros. Han fortel at ho har hatt heile 11 kalvar.

– Nå går ho med sin 12. kalv, seier Bjørn Åge. Han fortel at Kveldsros er spesiell på mange måtar.

– Ho er klok og veit godt kva ho vil. Ho likar å vera leiarku, bestemme over dei andre. Ho likar best å bestemme sjølv, rett og slett, ler Bjørn Åge og fortel at Kveldsros likar seg ekstra godt på ferie, når ho får reise til seters og gå ute og kose seg.