Canadiaren Gary Wilbert Pedersen var sonen til Gudmund Aurmo, som igjen var sonen til Peder Løkken.
– Peder Løkken var bror til Eldri, gift Syvergård. Gary Wilbert er ein slektning av oss, som ingen visste om før for om lag fire år sidan, seier Eldri Sørhage i Skjåk.
Ho fortel vidare at da canadiaren besøkte bygda for tre år sidan, besøkte han også Skjåk kyrkje der faren Gudmund Aurmo vart døypt i 1911. Gary Wilbert Pedersen vart aldri døypt som barn. Da faren Gudmund deltok i krigen, vart han hardt såra og vart liggjande på sjukehus i England resten av krigen. Han kom ikkje attende til Canada før i 1946. Da hadde Gary Wilbert vorte seks år gamal.
– Da slektningen vår var her for tre år sidan og mellom anna besøkte Skjåk kyrkje, var hans store ynskje å få døype seg i den same døypefonten som faren vart døypt i i 1911, seier Eldri Sørhage.
Fredag i førre veke vart ynsket oppfylt. Da var canadiaren attende i Skjåk, og det vart denne kvelden gjennomført dåpsmesse i Skjåk kyrkje for Gary Wilbert Pedersen. Slekt frå Soknedal, Skjåk og Lom deltok på dåpen til 78-åringen. Som ei stor overrasking for alle som deltok, vart det gjort kjent at faren Gudmund Aurmo vart døypt på akkurat same dato - heile 107 år tidlegare.
Den gamle døypefonten som vart brukt i 1911 var sett på plass i kyrkja.
– Det vart ei rørande og fin stund i kyrkja da Gary Wilbert fekk sitt store ynske oppfylt. Dette var verkeleg stort for han, seier Eldri Sørhage.
Det var sokneprest i Nord-Fron, Terje Elvestad, som hadde dåpen. Han forretta delvis på engelsk og delvis på norsk.
– Vi må få rette ein stor takk til kyrkjekontoret for den fine ramma dei stelte til rundt denne dåpsmessa, og til presten som gjennomførte den noko spesielle dåpen med glans, seier Eldri Sørhage.
