Klokka 21.45 laurdag kveld fekk politiet melding om ein mann i ein bil som hadde rygga på ein annan bil inne på Dønfoss Camping. Politiet rykka ut til campingplassen, og ein mann i 20-åra vart mistenkt for promillekøyring. Mannen, som ikkje er frå distriktet, vart teke med for blodprøvetaking.

– Mannen samtykka i førarkortbeslag, og det vart oppretta sak, seier operasjonsleiar i Innlandet politidistrikt, Marianne Brun.

Klokka 01.02 natt til sundag fekk politiet melding om eit trafikkuhell på riksveg 15 ved Skjåk kyrkje.

– Det var ein kollisjon mellom ein personbil og ein lastebil. Det vart ingen personskader i ulykka, og heller ikkje store materielle skader, seier Marianne Brun.

Operasjonsleiaren fortel at det var føraren av lastebilen som tok kontakt med politiet, etter at han kjente at det lukta alkohol av den kvinnelege bilføraren.

– Ho vart mistenkt for promillekøyring og samtykka i førarkortbeslag. Det er oppretta sak, seier Brun.

Den promillemistenkte kvinna er i fylgje politiet i 40-åra og heimehøyrande i distriktet.