Coop Mega Vågå skal bli Coop Extra. Det skriv Coop Ottadalen i ei pressemelding onsdag.
Arbeidet med å omprofilere Mega til Extra startar opp i slutten av inneverande år, og målet er at butikken skal stå ferdig i løpet av neste år.
– I Vågå satsar vi, i tillegg til vanleg sortiment, på ei eiga avdeling med ferskvare og større utval av lokalproduserte matvarer, skriv Coop Ottadalen i pressemeldinga.
Coop Ottadalen har sett over fjellet i vest og har etablert eit godt samarbeid med Coop Vest som har lykkast godt med satsing på ferskvare og lokalmat som såkalla «Shop in Shop» i nye Extra-butikkar i sitt område.
– Desse suksesshistoriene ynskjer vi å nytte oss av når vi nå skal planleggje den nye Extra-butikken i Vågå, seier dagleg leiar i Coop Ottadalen, Rune Fossmo.
Coop Vest har i lang tid hatt Arne Brimi med på laget i utviklinga av ferskvare- og lokalmatkonsept i Extra-butikkane sine, og Coop Ottadalen vil også ha med Arne Brimi på laget framover. I fylgje Rune Fossmo skal det knytast avtaler med lokale produsentar som får butikken som utstillingsvindauge for produkta sine.
Arkitektar jobbar i desse dagar med å finne løysingar på ei utviding av dagens butikkareal på Coop Mega Vågå.
