Mads Erik i semifinalen

Vårdølen Mads Erik Odde er valt ut som éin av seks semifinalistar til INTRO-folk, «Årets unge folkemusikar 2018».

INTRO-folk er eit lanseringsprogram for unge, lovande folkemusikarar i regi av FolkOrg. Målet med prosjektet er å skape ein arena der eit avgrensa tal unge folkemusikarar kan utvikle seg som kunstnarar og få erfaring i musikkformidling på eit høgt nivå.

Mads Erik Odde skal spele semifinale på Telemarkfestivalen i august. Om Odde kjem til finalen i november, er han med i kampen om å vinne GRAMOstipend på 100.000 kroner, og speleoppdrag på Riksscenen og «showcase» på Folkelarm 2019.

Seks artistar har sikra seg semifinaleplass i sterk konkurranse med andre. For utan Mads Erik Odde, består semifinalistane av Johanne Flottorp, Rasmus Kjorstad, Helga Myhr, Ole Nilssen og Ingvild Blæsterdalen.

Mads Erik Odde er aktiv i ulike konstellasjonar, mellom andre «FIRO» og «Lendmenn».