Sundag var det sirkus på Mogard i Bismo. Det er sirkusdirektør Jan Ketil Smørdal frå Eid som i desse dagar besøker Ottadalen med sitt sirkus-show.
Cirkus Agora sin eigen husklovn Pepino var framme i manesjen mange gongar i løpet av framsyninga, og ved fleire høve hadde han bruk for assistanse av publikumarar.
Ein gjeng med ungdomar frå Skjåk var blant kveldens assistentar. Dei meistra rampeljoset i manesjen svært godt og hausta både latter og stor applaus da dei stilte opp som «orkester».
Fleire andre publikumarar fekk også prøve seg i manesjen på Cirkus Agora.
Gjennom den bortimot to timar lange framsyninga baud det kjende sirkuset mellom anna på halsbrekkande balansekunst, sjonglørar i verdsklasse, luftig akrobatikk, sjarmerande shetlandsponniar, og den smarte hunden Boffo.
Måndag kveld gjestar Cirkus Agora Vågå.