Tradisjonen står sterkt på Lalm med markering av arbeidarane sin internasjonale kampdag.
Jo Ivar Kleiven som er leiar i Lalm arbeiderlag fortel at i år blir det ein annan vri på toget.
Som vanleg blir det flaggheising og musikk av Lalm musikkforening om morgonen.
På føremiddagen blir det samling ved samfunnshuset for tog. Kleiven fortel at i staden for å gå i sentrum, over brua til Baksida og attende, vil toget i år gå til industriområdet på Kolbotn.
Lalm musikkforening og Vågå musikkforening vil sørgje for god marsjtakt.
Her blir det offisiell opning av Bårstadhallen av fylkesordførar Even Aleksander Hagen, før toget går attende til samfunnshuset og samling i storsalen.
Fylkesordføraren er hovudtalar for dagen, og det vil bli halde appellar ved ordførar i Vågå, Iselin Vistekleiven, varaordførar i Sel, Lene Jevnheim og landbrukspolitisk talsmann i Vågå Ap og fylkespolitikar, Ivar Vistekleiven.
Tradisjon tru er det Gjermund Øihusom som skal leie programmet.
Det blir også underhaldning og høve til å kjøpe middag på samfunnshuset denne dagen.