Under ei synfaring i Finndalen hausten 2016 kom representantar frå Norges vassdrags- og energidirektorat (NVE) med signal om at dei kunne bistå i planlegging av tiltak i Finna. Nå har NVE endra meining.
Ikkje prioritert
Distriktsingeniør Tore Leirvik i NVE skriv i ein epost til plan- og miljøvernrådgjevar Sander Sælthun i Lom kommune, at dei ikkje har midlar for å sjå på flaumtiltak i Finndalen.
NVE får årlege midlar over statsbudsjettet til sikring i og langs vassdrag.
– Pengane dekkjer ikkje alle behov for tiltak som er meldt inn. NVE må difor prioritere dei tiltaka som har høgast samfunnsmessig nytte i forhold til kostnaden, skriv Leirvik om grunnen til at NVE ikkje kan prioritere bistand til planlegging av flaumsikringstiltak i Finna.
Kritisk
Sander Sælthun seier at kommunen vil ta eit møte med vernestyresmakter og bruksrettslaget for å drøfte vegen vidare.
– Det mest kritiske punktet er vest for Sterringsbrua. Her grev elva seg inn og det har endra seg mykje dei siste åra. Nedstraums brua har elva byrja å ete av dyrka mark på ei av setrene, seier Sander Sælthun.
I følgje Sælthun må det skje noko på det mest kritiske punktet i år.
– Det endrar seg mykje. Det er greit å få planlagt og sjå på kva som må gjerast, seier han.
Finndalen bruksrettslag utarbeidde ein rapport om utbetringstiltak etter flaum i Finnavassdraget i 2015.
Utarbeide plan
– Det er dessverre for små løyvingar til å drive førebyggjande arbeid i eit klima som er i endring. Det er lettare å gje store erstatningar framfor å drive førebyggjane arbeid, seier Rolv Kristen Øygard i Finndalen bruksrettslag.
Han seier at dei ikkje kan gje seg, men håpe at løyvingane blir større slik at ein kjem opp på prioriteringslista.
– Det er ikkje tid til å vente. Ved neste flaum kan det skje større ting. Hadde vi hatt ein plan, kunne vi fått gjort mykje for nokre titals tusen kroner. Men vi må få fagfolk til å utarbeide ein godkjent plan, seier Øygard.
