Alle som køyrde alpint eller telemark på slutten av 1990-talet og byrjinga av 2000-talet kjende til Tessand alpinklubb.
I løpet av nokre år stod klubben som arrangør av tre NM og seks Norgescup i telemark og 15 alpinkonkurransar. Klubben med løparar i Norgestoppen sette både grenda og Lemonsjøen på kartet.
Etter at klubben har lege i dvale i mange år, skal det nå blåsast nytt liv i Tessand alpinklubb.
Primus motor, da som nå, er Øistein Formo. Saman med Tor Ivar Furuset, Jon Dalen og Weldingh-brørne Brage og Tore, vil Formo gjenskape miljøet som var i klubben.
– Vi vil byggje eit nytt miljø som vi sjølve var ein del av, seier Brage Weldingh.
I vinter er det 20 år sidan alpinklubben på stutt varsel tok på seg å arrangere NM i telemark på grunn av snømangel på Voss.
– Vi hadde den beste klubben i telemark, seier Formo og nemner løparar som Harald Brimi, Torgrim Vole, Gaute Wangen, Hanne Kari Bakke, i tillegg til Weldingh-brørne.
Trioen Harald Brimi, Brage og Tore Weldingh vann også Galdhøpiggrennet fleire gonger. Tore Weldingh vann norgescupen samanlagt på heimebane i 1999.
Øistein Formo fortel at alpinklubben hadde over hundre medlemar i glansperioden. Han fortel om eit landsrenn på Bjorli der Tessand var den klubben som stilte med flest deltakarar. Blant dei som konkurrerte med tessandingane var ein ung gut frå Vinstra med namn Kjetil Jansrud.
I 2006 gjekk lufta ut av ballongen. Mange arrangement tæra på. så mange som 123 friviljuge stilte på eitt av meisteskapa.
– Mange av oss som var aktive den gongen kom i den alderen at vi reiste bort på skule, seier Jon Dalen.
Og målsetjinga er klar når ein nå startar opp att.
– Vi vil starte slik vi ein gong gjorde, skape eit miljø for å få opp att interessa for alpint blant dei yngste, seier Formo.
– Vi skal bli ein gjeng som skal køyre på ski saman, seier Dalen.
Tida får vise om det blir fleire meisterskap på Lemonsjøen i regi av Tessand alpinklubb. Portar og utstyr for tidtaking står klart for bruk. Kanskje blir det også blåse nytt liv i legendariske Lemonsjøracet?
