Det skriv hovudtillitsvalt Hilde Vikan i Norsk sjukepleiarforbund Lom, i eit innspel til 2018-budsjettet for Lom kommune.

I budsjettforslaget er det foreslått å redusere budsjettet i pleie- og omsorg med vel 1,4 millionar kroner. Det blir antyda, som Hilde Vikan uttrykkjer det, at det skal kuttast i aktivitørstilling, heimehjelpsressurs og kveldsvakt på skjerma avdeling.

– Norsk sjukepleiarforbund Lom ser svært alvorleg på at ein foreslår å redusere bemanninga ved Lom helseheim. Institusjonen har marginal bemanning. Ved ytterlegare reduksjon vil livskvaliteten til bebuarane bli kraftig forringa. Institusjonen vil bli ein stad for oppbevaring av bebuarar og det blir liten tid til å fylle dagane med meiningsfullt innhald. I 2017 har aktivitøren dratt i gang mange aktiviserings- og trivselstiltak for pasientane. Dette har gjeve meiningsfylt innhald i det som elles kan bli lange og innhaldslause dagar, skriv Vikan i innspelet.

Ho slår fast at personellet på helseheimen, dersom bemanninga blir redusert, vil ha nok med å få dekka grunnleggjande behov som hjelp til stell, mat og få koma på toalettet.

– Krevjande situasjonar som at pasientar blir akutt sjuke, rehabilitering og oppfølging av dårlege pasientar vil vera vanskeleg å følgje opp på ein god måte med redusert bemanning.  Norsk sjukepleiarforbund Lom ber om at ein vurderer innsparinga på nytt, heiter det i uttalen.

Også Livø Lund, som er avdelingssjukepleiar og fagansvarleg på skjerma avdeling, har kome med innspel i høve budsjettframlegget. Det er foreslått å redusere bemanning (seinvakt, journ. mrk) på avdelinga Fredly, som er ei spesialavdeling for personar med moderat til alvorleg grad av demens.

– Demens er ein sjukdom som gjev mykje utryggleik, uro, redsle og vandring, skriv Lund, som i uttalen peikar på fleire konsekvensar ved å kutte ei seinvakt på Fredly. Somme pasientar treng å sitja åleine med pleiar for å greie å eta, somme gonger kan personellet bruke ein time for at pasienten skal få i seg nok næring ved kvart måltid. Ro er viktig. Utan nok tid, kan det vera fare for underernæring. Lund peikar òg på at pasientar i avdelinga ofte vil ha ynskje om å reise heim. Ved dårlegare bemanning blir det vanskelegare å avverge at nokon går ut av avdelinga. Desse pasientane vil i så tilfelle vera til fare både for seg sjølve og andre, påpeikar ho.

– I denne avdelinga kan ein ikkje setja frå seg medisinbeger og meine at pasienten tek medisinen sin. Dei fleste har ikkje forståing for at dette er naudsynt. Ofte må personellet gjera fleire forsøk for å lykkast, kanskje må ein annan prøve eller kanskje må ein vente ei stund og prøve på nytt. Vi vil få eit problem både med å få tid til å gje medisin i rett tid og få pasienten til å ta medisinen, skriv Lund.

Ho peikar òg på at kutt i stilling vil føre til meirarbeid for den enkelte og meir uro på grunn av stress som da vil «smitte over» på pasientane.

– Det må òg kommenterast at kutt i aktivitørstillinga vil ha svært negativ konsekvens også for pasientar på skjerma avdeling. Lom helseheim skal vera noko meir enn ein «oppbevaringsplass» der mat og stell er alt som er. Pasientane har rett på sosial aktivitet og samspel med andre, skriv avdelingssjukepleiar Livø Lund.

Kommunestyret i Lom skal behandle framlegg til budsjett og økonomiplan fyrstkomande tysdag.