– Har du liggjande klede som ikkje passar eller som ikkje blir brukt lenger, men som andre kan ha glede av? Nytt høve til å rydde i klesskapet ditt, samtidig som du kan hjelpe andre, oppmodar Mari Wedum.

Saman med Bodil Ovesen ynskjer ho å gjera ein veldedig innsats for årets TV-aksjon som er sundag. I helga er det Lomsfest, og både laurdag og sundag blir det sal av brukte klede i andre etasje på blomsterbutikken Fjoset.

– Pengane går rett til årets TV-aksjon og UNICEF sitt arbeid for å gje utdanning til barn som er ramma av krig og konflikt, seier Mari Wedum.

Klede kan leverast på Fjoset i opningstida, eller setjast utanfor døra når butikken er stengt.

– Hugs at kleda skal vera i god stand og reinvaska før levering. Det som ikkje blir seld under klesmarknaden, blir levert til Fretex, seier Mari Wedum, som håpar mange tek turen til Fjoset i helga.