I alle tre ottadalskommunane blir det «Open brannstasjon» i tre timar fyrstkomande laurdag. Her blir det mellom anna moglegheit til å sjå på utstyr, prøve brannslange, sitja på i brannbil og delta på rebusløp med spørsmål om branntryggleiken heime.

I Lom går arrangementet føre seg på Loar-området utanfor biblioteket, medan i Skjåk og Vågå er det på brannstasjonane ting skjer denne dagen. Det blir servering både til små og store som tek turen innom arrangementet.

«Open brannstasjon» er ein del av den årlege Brannvernveka. I år er det branntryggleik i heimen som er hovudtema denne veka. I fylgje ei ny undersøking viser det seg at tre av fire familiar aldri har hatt brannøving heime.

– Open brannstasjon har vorte ein fin tradisjon som gjev oss eit unikt høve til å formidle brannførebyggjande bodskap til eit interessert publikum. Vi gler oss og håpar mange kjem på besøk laurdag, seier Unni Merete Lund i Lom og Skjåk brannvesen.