Laurdag føremiddag tok dølafekviga Brandros på Brimi nordre i Vårdalen seg ein tur i møkkakjellaren utan å tenkje over at der kunne ho lett bli ståande fast.
Brannvesenet berga kvige
Hans Brimi fortel at møkkakjellaren nyleg var tømt, så det var berre det i botnen som låg att.
- Vi hadde ikkje så mykje å hjelpe oss med, og kalla på brannvesenet som stilte opp på kort varsle, seier Brimi.
Mannskap frå Lom og Skjåk brannvesen la ut plater innover i møkkakjellaren som kviga skulle gå på ut att.
Brannmann Terje Mork var den som gjekk fyrst av brannmannskapa innover møkkakjellaren. Han fekk snudd kviga, som raskt kom seg ut i det fri.
Etter turen i møkkakjellaren måtte brannmannen ta av seg den møkkete kjeledressen.
– Ein må ofre seg somme gonger, humrar Terje Mork.
Dette var fyrste oppdraget hans med å berge dyr frå ein møkkakjellar.
Denne gongen gjekk det bra med kviga. Og etter ein vask er kjeledressen til brannmannen like god.