Attgroing av det opne kulturlandskapet er ein problematikk på nasjonalt nivå.

Ein av årsakene er færre beitedyr og mindre aktivt seterbruk. Konsekvensen er at fine vegstrekningar gror att og utsikta frå vegen blir ein «grøn tunnel». Slik er det også i Sjodalen.

Med bakgrunn i dette ynskjer Vågå kommune å gjere ein innsats for å få rydda bjørk og kratt mellom fylkesvegen og Øvre Sjodalsvatnet, ein distanse på cirka 4 kilometer frå Krambua til Bessheim.

Kommunen har saman med Langmorkje Almenning og entreprenør vore på synfaring på den aktuelle strekninga. Anbodet er på 170.000 kroner.

Vågå Fjellstyre er positive til tiltaket og har gjeve 20.000 kr i tilskot. Det same har  Statens vegvesen. Langmorkje Almenning gjev bort trevirket gratis mot at kvist og kjørr blir rydda bort.

Rådmannen ønskjer å bruke 10.000 kroner av kulturmidlane til tiltaket. Med støtte frå fjellstyret og vegvesenet, står det da att 120.000 kroner for å få finansiert tiltaket.

Formannskapet skal tysdag behandle saka, og rådmannen innstiller på at politikarane løyver 120.000 kroner til rydding av skog og kratt i Sjodalen.