Før Landskappleiken i sommar laga Synnøve Øygarden på Veistadhjørnet kafé ei T-skjorte med dialektord på. Nå til Traktor-Rock lanserer ho ei T-skjorte med motiv av det meir vågale slaget.
«Ikkje ver blug - kyss meg», var tittelen på kulturkvelden under Landskappleiken i juni.
– Eg tykte det hadde vore artig å lage noko ut frå dette, seier Synnøve Øygarden. Og som sagt så gjort.
Dottera Inga Elda har designa motivet på T-skjorta.
– Den er vågal. Spørst om det er nokon som tør å gå med denne, seier Synnøve. Ho håpar folk tek utfordringa, kjøper seg T-skjorte og går med denne under Traktor-Rock.
– Ein kan bruke T-skjorta som pyjamas seinare. Motivet passar vel bra når ein skal leggje seg, seier Synnøve Øygarden med eit smil.