Huseiernes Landsforbund har fått Statistisk Sentralbyrå til å utarbeide ei undersøking om kommunale avgifter i landets kommunar.
I gjennomsnitt betaler norske bustadeigarar 12.780 kroner i kommunale gebyr. I Ottadalen er det berre Lom som ligg under snittet, med ein samla prislapp på 12.018 kroner.
– Regelen er at gebyra til innbyggjarane i sum ikkje skal overstige kva det kostar å levere tenestene, seier utgreiingssjef i Huseiernes Landsforbund, Kristin Gyldenskog.
Det stadfestar administrasjonssjef Ola Helstad i Lom kommune.
– Det er sjølvkostprinsippet som ligg i botnen for dei kommunale avgiftene og dei blir sett utifrå investerings- og driftskostnader på dei ulike områda. Ein kommune skal ikkje tene på dei kommunale avgiftene, og eventuelt overskot skal gå til drift og investeringar, seier Helstad.
Tala vil variere frå år til år, og prisen på tenestene vil gå ned når ein kommune får mindre utgifter til drift, vedlikehald og investeringar - og i motsett fall auke.
Huseiernes Landsforbund gjev desse tala for ottadalskommunane:
LOM
vatn: 3.858
avløp: 4.939
renovasjon: 2.520
feiing: 701
totalt: 12.018 kroner
VÅGÅ
vatn: 5.576
avløp: 4.949
renovasjon: 2.180
feiing: 506
totalt: 13.211 kroner
SKJÅK
vatn: 2.683
avløp: 7.078
renovasjon: 2.738
feiing: 441
totalt: 12.939 kroner