Vann gruppespel

Ottadalen fekk torsdag sin fyrste siger under Landskappleiken da Åshild Aasgaard og Ragna Valde Sletten frå Vågå spel- og dansarlag vann gruppespel junior.

Dei to jentene spela Nyttårsløfte av Bjørn Kåre Odde og Skålhallingen. Det var stor jubel i Vågåhallen torsdag kveld da Åshild og Ragna vart ropt opp som vinnarar av klassa.

Landskappleiken i Vågå byr på travle dagar for dei to jentene. Torsdag deltok dei to også i lagdans senior. Fredag skal dei delta i lagspel junior og laurdag deltek dei i lagdans junior. Åshild deltok også i dans fele klasse C onsdag, der ho dansa både parhalling og springleik saman med Gjermund Valde Sletten.

Eldprøva for dei felejentene blir C-klassa laurdag. Da skal dei to venninnene konkurrere mot kvarandre.

Etter andre dagen av Landskappleiken har Ottadølane hevda seg bra.

Onsdag vart Julianna Banken og Sverre Melhus Dahl frå Skjåk spel- og dansarlag nummer to i dans fele klasse C.

Ann Kristin Ulsanden og Odd Ivar Ulsanden frå Vågå spel- og dansarlag vart nummer tre i dans fele klasse B.

I gruppespel senior vart Sivert Holmen frå Valdres og Bjørn Kåre Odde frå Garmo nummer tre i klassa. Tufskrøkjun med Ann Kristin Odnes, Astrid Sulheim og Synne Grothe vart nummer to.